E.F. / P.S. / V.S. / XORNAL.COM I

Santiago.-

A Unión de Gardas Civís acusa aos mandos da Benemérita en Galicia de facer controis “masivos” e “ilegais” para identificar aos conductores de vehículos, só con obxectivo de lograr galardóns. “É un problema de medallitis”, dixo o secretario xeral a nivel estatal da asociación.

Manuel Mato explicou onte que, baixo o nome de “puntos de identificación”, páranse a coches “sen motivos e indiscriminadamente”. Tamén lembrou que os controis teñen que estar “autorizados polo poder político. “Non podemos someter á poboación civil a un Estado policial”, dixo o responsable da UGC. Dende a organización tamén acusan a algúns mandos de “botar en falta os tempos de antes do ano 75”. Mato referíase a que altos cargos do Instituto Armado “levar un condutor”, cando “por lei non teñen dereito”. “Iso implica un axente menos traballando na rúa”, dixo o secretario xeral da UGC.

Ademais de “pasear mandos”, a asociación tamén criticou que “a maior parte dos recursos” da unidade de Tráfico de Santiago se adica a “levar a políticos” en vez de “dedicarse á seguridade viaria”.

Eleccións ao consello

O responsable do colectivo fixo esta denuncia onte durante a presentación das súas candidaturas ás eleccións ao Consello da Garda Civil. Aínda que din que este proceso faise “grazas a leis lixo que non merecen” piden a participación dos axentes do corpo para “melloralo” dende dentro.

Manuel Mato asegurou que nestes comicios –que se celebran o 22 de xaneiro– “a UGC por primeira vez vai ter representación trala dictadura da Asociación Unificada de Gardas Civís (AUGC)”. Este colectivo foi obxecto das críticas da Unión, xa que consideran que é unha organización que “aplaude” as decisións do Ministerio de Interior. Pola contra, Mato erixiu á UGC como a “asociación rebelde”.

Con máis de 7.000 afiliados en España –800 deles en Galicia – demandan máis orzamentos e infraestruturas para o Instituto Armado. Ademais, solicitan a reagrupación de cuarteis pequenos e “un 40 por cento máis” de axentes para os cadros de persoal.

Xornal.